FARMAKONƏZARƏT
Dərman vasitəsinin keyfiyyəti onun tərkibindəki təsiredici maddənin farmakoloji xüsusiyyətlərinə müvafiq terapevtik təsiri ilə birbaşa bağlıdır, lakin bəzən arzuolunmaz təsirlər də meydana çıxa bilər. Bu təsirlər preparatın tərkibindəki komponentlərin xüsusiyyətləri və ya orqanizmin preparata qarşı cavab reaksiyası ilə əlaqədar ola bilər. Klinik təcrübədə dərman vasitəsinin istifadəsi mütləq onun fayda/risk nisbətinin qiymətləndirilməsinə əsaslanır, bu zaman
dərman vasitəsinin istifadəsi zamanı gözlənilən fayda potensial riskindən əhəmiyyətli dərəcədə artıq olmalıdır. Bunun üçün dərman vasitəsinin effektivliyini sübut edən dəlillər kifayət etmir, eyni zamanda onun təhlükəsizliyinin öyrənilməsi də tələb olunur.
Dərman vasitəsinin təhlükəsizliyinə nəzarəti farmakonəzarət sahəsi yerinə yetirir. Farmakonəzarət- dərman vasitələrinin əlavə təsirlərinin, arzuolunmaz nəticələrinin, həmçinin dərman vasitəsinin istifadəsi zamanı təhlükəsizliyi və effektivliyi ilə bağlı istənilən problemlərin aşkarlanması, toplanması, qiymətləndirilməsi, öyrənilməsi və qarşısının alınması ilə məşğul olan fəaliyyət növüdür. Əlavə təsir – xəstəliklərin profilaktikası, müalicəsi və ya diaqnostikası üçün lazım olan dozalarda istifadə olunan dərman vasitəsinin istənilən gözlənilməz və zərərli təsiridir.
Azərbaycan Respublikasında Farmakonəzarət sisteminin fəaliyyəti Azərbaycan Respublikası Nazirlər Kabinetinin “Dərman vasitələrinin farmakonəzarət Qaydası”nın təsdiq edilməsi haqqında 503 nömrəli qərarı, “Dərman vasitələrinin geri çağırılması Qaydası”nın təsdiq edilməsi haqqında 406 nömrəli qərarı və "Etibarlı Farmakonəzarət Təcrübəsinə dair Təlimat”ın təsdiq edilməsi barədə 39 nömrəli qərarına əsasən tənzimlənir. Dərman vasitələrinin təhlükəsizliyinə və effektivliyinə nəzarəti təmin etmək məqsədilə,şirkətimizdə mövcud qanunvericiliyin və beynəlxalq standartların tələblərinə müvafiq olaraq farmakonəzarət şöbəsi fəaliyyət göstərir.
Tibb işçiləri, pasientlər və pasientlərin maraqlarını təmsil edən şəxslərin və təşkilatların nəzərinə!
Əgər sizdə Gen İlac və Sağlık Ürünleri Sanayi ve Ticaret A.Ş. şirkətinin istehsalı olan və ya lisenziya sahibi olduğu dərman vasitələrinin istifadəsi ilə bağlı yaranan hər hansı bir əlavə təsir, yaxud dərman vasitəsinin effektivliyinin olmaması haqqında məlumat varsa, lütfən şirkətimizin məsul nümayəndələrinə məlumat verin.
Məlumatların göndərilməsi yolları:
1. Telefonla zəng etməklə:
Tel.: (012) 493 23 35 (daxili 109)
2. Elektron ünvana yazmaqla:
u.efendiyeva@genilac.com
3. Əlavə təsirlər haqqında bildiriş kartlarını doldurub yuxarıda göstərilən elektron ünvana və ya poçtla aşağıdakı ünvana göndərməklə:
Ünvan: Səbail rayonu, Xəqani küç.26/32, AZ 1000.Gen İlac və Sağlık Ürünleri Sanayi ve Ticaret A.Ş. şirkətinin Azərbaycan filialı.
Əlavə təsir haqqında bildiriş kartı (Tibb işçiləri üçün)
Dərman vasitəsinin əlavə təsiri haqqında bildiriş kartı (Pasientlər üçün)
Nələri bildirmək lazımdır?
- Ciddi əlavə təsirlər (ölümə gətirib çıxaran, insan həyatını təhlükə altına qoyan, xəstəxanaya yerləşdirməyə və ya xəstəxanada qalma müddətini uzatmağa vadar edən, uzun müddət ərzində əmək qabiliyyətinin itirilməsinə və ya əlilliyə gətirib çıxaran və ya anadangəlmə inkişaf anomaliyasına və ya qüsura səbəb olan hər hansı mənfi reaksiya)
- Ciddi olmayan əlavə təsirlər
- Gözlənilən əlavə təsirlər (istifadə təlimatında göstərilən)
- Gözlənilməz əlavə təsirlər (istifadə təlimatında göstərilməyən)
- Effektivliyin olmaması barədə